O BNG de Oroso mostra a súa preocupación pola amortización prevista de todas as prazas docentes do CRA de Oroso.

Na relación de vacantes que a Xefatura territorial da provincia de A Coruña trasladou á Xunta de Persoal Docente da citada provincia, todas as prazas docentes (nove mestres e mestras) do CRA de Oroso aparecen como prazas a amortizar. O Centro Rural Agrupado (CRA) reúne as catro escolas unitarias que temos no noso Concello.

Esta situación é a antesala do peche do citado centro educativo, ao que o BNG de Oroso se oporá con todas as súas forzas, dado que o CRA de Oroso leva o ensino público de calidade a todas as parroquias do noso Concello, vertebrándoo no que é a súa realidade. Esta situación súmase á desaparición do proxecto "Preescolar na Casa" grazas ao goberno do partido popular na Xunta de Galiza, que tamén prestaba un gran servizo en Oroso.

A amortización das prazas non supón o peche inmediato do centro educativo, pero si mostra o camiño formulado polo Partido Popular para o noso concello e que non é outro que o de continuar cos recortes e ataques ao ensino público, máis aínda no rural.

Ante este ataque, o BNG de Oroso non pensa quedar impasíbel, anunciamos unha próxima asemblea aberta coas nais, pais e profesorado do centro para acompañalos en todas as medidas que estean dispostas e dispostos a emprender, comezando coa solicitude inmediata dunha entrevista por parte da comunidade educativa co Xefe territorial da provincia de A Coruña.

Pola nosa parte xa nos puxemos en contacto cos nosos deputados autonómicos para trasladar ao Parlamento o ataque directo do Partido Popular ás nenas e nenos de Oroso, que se suma ao sempriterno novo CEIP que nunca chega, salvo para a foto electoral, como ben se demostrou nas últimas eleccións onde o partido popular tivo a pouca vergoña de pór o cartaz do CEIP e ter máquinas removendo terra até tres días antes das eleccións, máquinas que agora xa non están alí.

As nove prazas amortizadas serían catro de infantil, unha de primaria, unha de educación física, unha de audición e linguaxe, unha de lingua estranxeira (inglés) e unha de educación musical.

Podedes ver toda a información sobre o CRA de Oroso na seguinte ligazón